У Беларусі ўзнікла чарговая праблема на рынку працы, яна датычыць спецыялістаў, якія аказваюць юрыдычныя паслугі. Бізнес і самі юрысты звяртаюць увагу Мінюста на тое, што праз узмацненне жорсткасці ліцэнзавання такіх паслуг істотна знізілася колькасць тых, хто здае кваліфікацыйны экзамен. «Гэта пацягне істотнае скарачэнне колькасці суб’ектаў, якія маюць права на аказанне юрыдычных паслуг, што негатыўна паўплывае на ўмовы вядзення бізнесу», — заяўляюць у Савеце па развіцці прадпрымальніцтва.
Гэтае пытанне абмеркавалі 11 жніўня на паседжанні грамадска-кансультацыйнага савета па развіцці прадпрымальніцтва пры Мінюсце, паведамляе Савет па развіцці прадпрымальніцтва.
У Савеце ўдакладняюць, што звярнуліся з гэтай праблемай у Мінюст з прычыны «зваротаў, якія паступаюць з нагоды праблем у сферы аказання юрыдычных паслуг, абумоўленых узмацненнем жорсткасці ліцэнзійных патрабаванняў да суб’ектаў дадзенай сферы дзейнасці».
Нагадаем, з гэтага года пачаў дзейнічаць новы закон «Аб ліцэнзаванні», які зрабіў больш жорсткім ліцэнзаванне юрыдычных паслуг. Так, чыноўнікі ўвялі абавязковую ўмову для атрымання ліцэнзіі — наяўнасць у работніка юрыдычнай асобы, якая будзе аказваць юрпаслугі, і ў ІП — пасведчання пра атэстацыю асобы, якая аказвае такія паслугі. Юрысты мусілі да 1 ліпеня перавесці сваю працу пад новыя ліцэнзійныя патрабаванні, а да 1 жніўня — падаць справаздачу пра гэта ў Мінюст.
Новаўвядзенні прывялі да «нізкага ўзроўню станоўчай здачы кваліфікацыйнага экзамену дзейнымі юрыстамі-ліцэнзіятамі», гэтую праблему абмяркоўвалі ў Мінюсце 11 жніўня.
«На думку прадстаўнікоў дзелавых колаў, складаная працэдура здачы кваліфікацыйнага экзамену і атрымання пасведчання пра атэстацыю ствараюць залішнія бар’еры для ажыццяўлення прадпрымальніцкай дзейнасці ў гэтай сферы. Гэта пацягне істотнае скарачэнне колькасці суб’ектаў, якія маюць права на аказанне юрыдычных паслуг, што негатыўна паўплывае на ўмовы вядзення бізнесу», — заяўляюць у Савеце па развіцці прадпрымальніцтва.
У Савеце адзначаюць, што на сустрэчы ў Мінюсце вырашылі «аператыўна маніторыць сітуацыю на рынку юрыдычных паслуг, выпрацаваць канкрэтныя прапановы па нівеляванні наяўных праблем у рамках дзейнага заканадаўства па ліцэнзаванні, а таксама па напрамках яго далейшага ўдасканалення».
Чытайце таксама
