У Бабруйску бацька і двое сыноў недаплацілі больш за мільён рублёў падаткаў са арэнды камерцыйнай нерухомасці. У іх арыштавалі маёмасць на суму, амаль у 20 разоў большую, пры гэтым бабруйчане кампенсавалі шкоду і просяць вызваліць іх ад крымінальнай адказнасці, паведамілі ў Следчым камітэце.
Фігурантамі крымінальнай справы пра ўхіленне ад выплаты падаткаў у асабліва буйным памеры стаў «сямейны падрад» — 67-гадовы мужчына і двое яго сыноў, 50 і 37 гадоў.
Цягам пяці гадоў бабруйчане пад кіраўніцтвам бацькі развівалі бізнес па здачы ў арэнду 28 аб’ектаў камерцыйнай нерухомасці — для гэтага яны таксама фармальна зарэгістравалі сваіх партнёрак у якасці ІП, хоць не раскрывалі ім падрабязнасцяў вядзення бізнесу.
Схему раскрылі супрацоўнікі падатковай падчас пазапланавай праверкі. Следчыя выявілі, што прадпрымальныя бізнесоўцы раздрабілі бізнес для атрымання падатковых ільгот і ўхілення ад выплаты падаткаў. У выніку дзяржаве была нанесеная шкода больш чым на мільён рублёў.
Дзеянні мужчын кваліфікаваныя паводле ч. 3 арт. 243 КК, на іх маёмасць накладзены арышт на агульную суму больш чым 19 млн рублёў. Падчас папярэдняга расследавання сваякі цалкам кампенсавалі шкоду, а таксама заплацілі звыш 550 тысяч рублёў пені па падатках. Яшчэ яны ўнеслі крымінальна-прававую кампенсацыю ў памеры сумы шкоды.
Цяпер экс-бізнесоўцы звярнуліся з хадайніцтвам наконт вызвалення іх ад крымінальнай адказнасці як асоб, якія спрыялі раскрыццю злачынстваў і ліквідацыі наступстваў іх здзяйснення.